martes, 24 de marzo de 2015

¿Qué ye la Ilesia Ortodoxa?


La Ilesia Católica Apostólica Ortodoxa ye una comunidá cristiana que la so antigüedá, según la tradición, remóntase a Xesucristu y a los dolce apóstoles, a traviés d'una non torgada socesión apostólica. Ye la tercera de les tres grandes ilesies o comunidaes cristianes, xunto cola Ilesia Católica Romana y el conxuntu d'ilesies protestantes, y cunta con aprosimadamente 215 millones de fieles en tol mundu.
 
La Ilesia Ortodoxa ye la heriede de toles comunidaes cristianes de la metá oriental del Mediterraneu. La so doctrina teolóxica afitóse nun riestra de conceyos, de los que los más importantes son los Siete Conceyos Ecuménicos, que tuvieren llugar ente los sieglos IV y VIII. Tres dellos desalcuentros y resmes, la Ilesia Ortodoxa y lo qu'anguaño ye la Ilesia Católica Romana separtáronse na denomada Gran Cisma el 16 de xunetu de 1054. El cristianismu ortodoxu espardióse per Europa Oriental gracies al prestixu del Imperiu Bizantín y a la xera de numberosos grupos misioneros.

Ente los países ortodoxos más importantes tán Rusia, Ucraína, Bielorrusia, Rumanía, Serbia, Montenegro, Bulgaria, Macedonia, Grecia y Xipre.
 
Les llingües de la Ortodoxa son el griegu pa les ilesies grieges y d'Oriente Mediu, l'antiguu eslavu eclesiásticu o antiguu búlgaru pa les ilesies eslaves y les llingües llocales pa les demás.
Ilesies Ortodoxes
 
Anguaño, el cristianismu ortodoxu ye la relixón dominante en Grecia, Xipre, Rusia, Ucraína, Bielorrusia, Serbia, Montenegro, Macedonia, Bosnia y Hercegovina, Rumanía, Moldavia, Bulgaria, Xeorxa y Armenia. Darréu de la emigración hai delles comunidaes importantes nos Estaos Xuníos, Canadá y Australia.
 
La Ortodoxa organízase n'ilesies autocéfales, a la tiesta de les qu'hai un obispu o patriarca que nun depende de nengún mandatariu eclesiásticu superior como ye'l casu de la Ilesia Católica.
 
La Ilesia Ortodoxa reconoz l'autoridá, namái simbólica, del Patriarca Ecuménicu de Constantinopla.
 
 
Fonte: Wikipedia